ترکیه له افغانستان سره په صنعت او نورو برخو کې همکاري کوي

د مالیې وزارت سرپرست ملا هدایت الله بدري، پرون په کابل کې د ترکیې له سفیر جیهاد ارګینآی سره وکتل.
د مالیې وزارت د یوې خبرپاڼې په خپرولو سره ویلي، چې په دې کتنه کې د مالیې وزارت سرپرست ویلي، چې ترکیه او افغانستان نه بیلېدونکي تاریخي او مذهبي اړیکې لري او په تېر کې، د افغانستان ښه مرستندوی هېواد پاتې شوی دی.
هغه د ترکیې له سفیر څخه غوښتي چې د آمو سیند اړونده ساحه کې د رامنځته شوي بشري ناورین په مخنیوي کې همکاري وکړي؛ د بیمې تکافل او اسلامي مالیاتو په برخه کې خپلې تجربې شریکې کړي او همدا رنګه، د ماليې وزارت کارکوونکو ته د ظرفیت لوړونې او روزنیزو پروګرامونو او سکالرشيپونو زمینه برابره کړي.
د مالیې وزارت سرپرست ډاډ ورکړی چې اوسمهال په افغانستان کې د پانګونې ښه فرصتونه رامنځته شوي، نو ترکي پانګه وال کولای شي چې د کرنې او دولتي شرکتونو د ودې په برخه کې پانکونه وکړي.
د ترکیې سفیر هم، په اوسني نظام کې د مالیې وزارت دنده مهمه او ستونزمنه بللې او د دوی کارونه یې ستایلي دي.
هغه هم ‌ډاډ ورکړی چې ترکیه د صنعت په برخه کې پرمختللي امکانات او ښې تجربې لري، چې په دې برخه کې به له افغانستان سره همکاري وکړي.