مقالی اوتبصرې

دمګړۍ کورنۍ او بهرنۍ پانګونې ته ښه زمينه برابره شوې

د خوښۍ ځای دادی، چې افغانستان د تېرو څه باندې څلورو لسیزو جګړو او ناخوالو وروسته د پرمختیايي هېوادونو په لړ کې راځي او موږ ټول افغانان دمګړۍ د اقتصادي ودې او پرمختګ بهیر ته داخل شوي یو.موږ وينو چې نن سبا ډېرو بهرنيو پانګوالو په افغانستان کې پانګونې ته ليوالتيا ښودلې، چې په اوسني وخت کې دا د سيمې او نړۍ له هېوادونو سره د اسلامي امارت د غوره تعامل او اقتصادي نږديوالي نښه ګڼل کېږي. داچې د نړۍ پرمختللي هېوادونه د اقتصادي ودې په موخه له افغانستان او يا نورو هېوادونو سره پانګونې ته اجازه ورکوي، د دې ښکاره دليل دادی، چې دوی په کور د ننه خام مواد کم لري او يا داچې د چټکې اقتصادي ودې لپاره بسنه نه کوي، نو په داسې حالت کې اړ دي، چې له بهرنۍ پانګونې څخه ګټه پورته کړي، له دې ډلې يو هم افغانستان دی، چې لا تر اوسه خودکفا شوی نه دی او د پرمختيايي هېوادونو د ځانګړنو پر اساس د پانګې له کمبود سره مخ دی او هر څه له بهرنيو هېوادونو را واردوي، خو الحمدلله د اسلامي امارت په بیا واکمنېدو سره په افغانستان کې د خپلې اقتصادي ودې، پرمختګ او هوساینې لپاره هغه ټولې لارې چارې په کار اچولې،چې نن سبا به زموږ اقتصادي پرمختګ په غوړېدو راشي او په راتلونکې کې به مو د پرديو له احتیاجه خلاص کړي.هغه داسې ده، چې په دې وروستيو کې د اسلامي امارت مشرتابه کورنیو او بهرنیو پانګوالو ته د اسانتیاوو برابرولو په موخه د پانګونې بین الوزارتي کمېټه جوړه کړه، چې موخه یې د پانګونې په برخه کې د اسانتیاوو رامنځ ته کول او په ادارو کې د بیروکراسۍ ختمول دي.ياده کمېټه به د اقتصادي معاونیت تر چتر لاندې فعالیت کوي او په فعالیتونو کې یې د پانګونې لپاره د پلانونو پلي کول، د پانګونې د بهیر چټکتیا او روڼوالی رامنځ ته کول شامل دي، د یادونې وړ ده چې له دې وړاندې د امریکايي پانګوالو یوه پلاوي په افغانستان کې د کانونو په برخه کې پانګونې ته لیوالتیا وښوده.د امریکايي پانګوالو پلاوي ژمنه وکړه چې امریکايي پانګوال به افغانستان کې پانګونې ته وهڅوي چې ورسره به پام وړ شمېر افغانانو ته کاري فرصتونه برابر شي. د امريکا په شان چين او برېتانيا هم د افغانستان د کانونو په برخه کې پانګونې ته زړه ښه کړی او غواړي، د افغانستان خام مواد استخراج کړي، همدارنګه ملا عبدالغني برادر ترکيې د خپل سفر په لړ کې افغان او ترکي پانګوالو ته ډاډ ورکړ چې په افغانستان کې د امنیت په ټینګېدو سره د پانګونې لپاره ښه زمینه برابره شوې او اسلامي امارت د کانونو، کرنې، برېښنا تولید، زېربناوو، صنعت، مخابراتو، سوداګرۍ او نورو بېلابېلو برخو کې پانګونې ته اسانتیاوې برابرې کړي او د پانګوالو بشپړ ملاتړ کوي.له دې وراخوا بیا د کانونو او پټرولم وزارت له کورنیو او بهرنیو شرکتونو سره د څه باندې شپږ نیم میلیاردو ډالرو په ارزښت د اوو لویو کانونو د ایستلو او پروسیس تړونونه لاسلیک کړل چې د چارواکو په خبره لسګونو زرو افغانانو ته به کاري فرصت ورسره برابر شي.بهرنیو پانګوالو په افغانستان کې په داسې حال کې پانګونې ته زړه ښه کړی، چې اوس په ټول هېواد کې سرتاسري امنيت تامين شوی او د کورنيو او بهرنيو پانګوالو پر مخ ټولې پرتې ستونزې د حل کېدو په حال کې دي، له دې مخکې به پانګوال د خپلو پانګو په وېره کې و او نه يې شوای کولای چې خپلې پیسې له ځانه سره انتقال او يا يې په کورونو کې وساتي، خو اوس دا ستونزه کابو ۹۰ سلنه حل شوې او تازه آسيايي پراختيايي بانک په افغانستان کې د بيا فعاليت خبر ورکړی، چې د ۲۰۲۴ کال په جنورۍ او يا فبرورۍ کې به بېرته خپله څانګه په کابل کې پرانېزي، دغه راز د اسلامي امارت په راتګ سره د خلکو ځاني امنيت ساتل شوی او هغه وخت پای ته رسېدلی، چې په لکونو ډالر به يې د خپل ځان ، اولاد او کورنۍ په امن او سکون لګول او یا به یې د خپلې شتمنۍ د ساتلو لپاره په بهرنيو هېوادونو کې پانګونه کوله، مطلب داچې اسلامي امارت امنيتي ځواکونو د اختطاف لړۍ جرړې ايستلې او درګرده د انسان تښتونې پر ضد مبارزه روانه ده، د دې تر څنګ په کور د ننه اداري فساد صفر شوی، د غلو چور او چپاول مخنیوی شوی او په ټول هېواد کې د زورواکو له لوري بډې اخيستنې لړۍ ختمه شوې او هېڅکله به په غير قانوني ډول له خلکو پيسې وانه خيستل شي. همدا لاملونه وو، چې کورنيو او بهرنيو پانګوالو په افغانستان کې پانګونې ته لېوالتيا نه درلوده، اوس چې په هېواد کې د کورنيو او بهرنيو پانګوالو لپاره د پانګونې لپاره زمينه برابره شوې، نو په کار ده، چې پانګوال په ډاډه زړه د افغانستان د اقتصادي ودې په پار پانګونه وکړي او بهرني پانګونې دې هم په افغانستان کې پانګې اچونې ته راجلب کړي.

احمد راشد

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *