د بشري مرستو یوه ۴۰ میلیون دالري کڅوړه کابل ته راورسېده

شریعت: د افغانستان بانک په یوه خبرپاڼه کې، کابل ته د ۴۰ میلیونو امریکايي ډالرو بشري مرستو د را رسېدو خبر ورکړی دی.

په خبرپاڼه کې ویل شوي دي: افغانستان ته د بشري مرستو په لړ کې، پرون ۴۰ میلیونه امریکايي ډالره نغدي مرسته کابل ته راورسېده.

د افغانستان بانک، د نړیوالې ټولنې د بشري مرستو قدرداني کړې او د زیاتو همکاریو غوښتنه یې کړې ده.

په همدې حال کې، دغه بانک هېواد ته له قانوني او اصولي لارو د اسعارو د واردېدو هرکلی کړی او د نړیوالې ټولنې د بشري مرستو د مننې ترڅنګ یې غوښتنه کړې ده چې په نورو مالي او بانکي برخو کې هم له افغانستان بانک سره غوره بانکي اړیکې وپالي.

د یادونې وړ ده چې افغانستان ته د بشري مرستو له پیله، د ۵۱ مه کمکي کڅوړه ده چې په نغدي ډول کابل ته را رسېږي او د هېواد یو سوداګریز بانک ته سپارل کېږي.

تېره اوونۍ هم له افغانستان سره د بشري مرستو په لړ کې، د بشري مرستو  دوه ۴۰ میلیونه ډالري کڅوړې د هېواد یو سوداګریز بانک ته لېږدول شوې وې.

دا په داسې حال کې چې افغانستان ته د مرستندویو هېوادونو د بشري مرستو د لېږلو بهیر له پیله تر اوسه، نږدې دوه میلیارډه امریکايي ډالر هېواد ته را رسېدلي دي.