په کندهار کې خلک شکایت کوي چې د دغه ولایت د لرو او نږدې ولسوالیو په روغتیایي مرکزونه کې متخصص ډاکټران نشته چې له کبله یې د دوی سمه درملنه نه کېږي او له روغتیايي ستونزو سره مخ دي. د پنجوایي ولسوالۍ اوسېدونکی اکبرجان وايي، په سیمو کې یې روغتیايي مرکزونه شته او د درملو ستونزه هم نه لري، خو د ټولو ناروغیو درملنه یو ډاکټر کوي.دی زیاتوي، د ولسوالیو په روغتیايې کلینیکونو کې دې د هر بخش یو متخصیص ډاکټر معرفي شي، څو د ښار روغتونونو ته د تګ لپاره مجبوره نه شي.«موږ روغتون ته مراجعه کوو، هر مریضي چې ولرو، یو ډاکټر نسخه راکوي. باید نور ډاکټران هم معرفي کړل شي،څو موږ د هرې ناروغۍ لپاره پوه ډاکټر ولرو.»د کندهار میوند ولسوالۍ اوسېدونکې صالح محمد وايي، د ولسوالیو په روغتیايي مرکزونو کې د سترګو، عصابو او پوستکي په ګډون د ګڼو نورو ناروغيو متخصص ډاکټران نشته، چې له کبله يې دوی اړ دي کندهار ښار ته د درملنې لپاره راسي.
« موږ روغتون ته راشو، پوه ډاکټر نه لرو. موږ نسائي ولادي ناروغان روغتون ته راولو، خو متخصیص ډاکټر شتون نه لري. په دغه برخه کې باید متخصیص ډاکټران د ولسوالیو په روغتیایی مرکزونو کې مقرر شي.»د کندهار عامې روغتیا ریاست مرستیال ډاکټر سیداحمد شاداب هم یاده ستونزه مني، خو وایي، دا ستونزه د ټول هېواد په کچه په ټولو ولسوالیو کې شتون لري.شاداب وايي، هڅې يي پیل کړې چې ټولو ولسوالیو او لري پرتو سیمو ته متخصیص ډاکټران ولېږي، څو په یاده برخه د خلکو ستونزې حل شي.«په ټوله افغانستان کی دا ستونزه شته چې د یو مرض لپاره متخصیص ډاکټر شتون ولري. موږ هڅه او کوښښ کوو، څو د هر بخش لپاره متخصیص ډاکټر ولېږو او د سیمي خلکو ستونزه حل شي.»په تېرو څو لسیزو کې د جګړو او نورو عواملو له کبله د هېواد لري پرتې سیمي له هر ډول خدماتو بې برخې پاتې شوې، ان په ځینو په سیمو کې تر اوسه هم ښځینه ډاکټران شتون نه لري.
