عزت هغه شريف خصلت، ښه عادت، لوړ اخلاق، او قيمتي ادب دی چي د عزتمندو انسانانو زړونه ورباندي عاشق دي او د با اعتباره خلګو نفسونه يې د کسبولو کوښښ کوي.
اسلام د عزت او کرامت دين دی، اسلام د ترقۍ او پرمختګ دين دی، اسلام د کوښښ او اجتهاد دين دی. اسلام د ذلت او مسکنت دين نه دی او اسلام د سستۍ او ټنبلۍ دين نه دی.
د روژې مبارکه مياشت د عزت حاصلولو لپاره ډېر پيراخ او وسيع ميدان دی او يوه ډېره ښه زمينه او فرصت دی په دې خاطر چي روژه تی په روژې باندي د عزت اخلاق لاس ته راوړلای سي پدې شرط چی خوړل، څښل،، شهوت او ټول ګناهونه پسې پرېږدي.
ځکه د روژې په نيولو باندي انسان د بې اعتباره حالت او سپکو کارونو څخه را وځي او د عاداتو د زندان او نفسي غوښتنو څخه نجات پيدا کوي چي دا خپله لوی عزت دی.
همدا راز روژه تی پدې باندي عزت پيدا کوي چي په روژه کي ځان د جنګ، رياء، جهالت، فسق او عبثو کارونو څخه ساتي ځکه چي رسول الله صلی الله عليه وسلم فرمايي: إذا كان يوم صوم أحدكم فلا يرفث، ولا يصخب » وفي رواية « ولا يجهل » ، وفي رواية « ولا يجادل »
ژباړه: کله چي ستاسي څخه د یوه روژه وي نو فسق دي نه کوي او چيغي دي نه وهي، په بل روایت کي راغلي دي: جهالت دي نه کوي او په بل روایت کي راغلي دي: جنګ دي نه کوي.
او دا معلومه خبره چي څوک داسي روژه ونيسي نو د ځان لپاره يې عزت او کرامت وساتی او د هغو خلګو څخه يې ځان و ايستی چي ښکنځل او بدي خبري ورته خوند ورکوي.
همدا راز مسلمان روژه تی په دې باندي عزت تر لاسه کوي چي په دې مبارکه مياشت کي ډېر عبادات کوي ځکه په ډېر عبادت باندي طبعا د انسان ارتباط د الله تعالی سره ټينګيږي او نورو شيانو سره يې رابطه لږېږي چي پدې کار باندي انسان عظيم عزت تر لاسه کولای سي ځکه چي د الله پاک سره ډېره رابطه، د عباداتو ډېروالی او د ايمان قوت رښتينی او حقيقي عزت دی. الله پاک فرمايي: ژباړه: عزت د الله، ر سول او مؤمنانو لپاره دی. [المنافقون 8]
همدا راز مسلمان روژه تی په دې باندي عزت تر لاسه کولای سي چي په دې مبارکه مياشت کي د الله پاک په لاره کي ډېر انفاق کوي، د اړو انسانانو سره نيکي او احسان کوي او د خلکو حاجتونه پوره کوي چي دا خپله د انسان لپاره لوی عزت دی ځکه چي په دې کار باندي ډېر مسلمانان د سوال څخه ساتل کېږي او د ډېرو اخلاقي مفاسدو مخه نيول کېږي چي دا کار د ډېر ثواب تر څنګ د مسلمان لپاره لوی عزت هم دی.
مولوي نورالحق مظهري
