افغانستان

فراه کې یو سړک بیا ورغول شو

د فراه ښاروالۍ مسوولین وايي، چې د یاد ولایت په مرکز کې د یو سړک د بیا رغونې چارې بشپړې او ګټې اخیستنې ته سپارل شوی دی.
د فراه ښاروال مولوي محمد ولي ادریس د باخترآژانس خبریال ته ویلي چې یاد سړک د ۵۶۰ مترو په اوږدوالي او ۲۰ مترو په سور د فراه ښاروالۍ له پراختیايي بودجې څخه د ۲۳،۵ میلیونه افغانیو په لګښت د ۴ میاشتو په بهیر په پاخه او اساسي توګه رغول شوی دی.
نوموړي له ټولو خلکو، موټر چلوونکو او ښاري وګړو څخه د یاد سړک په بلوارونو کې د کرل شویو ګلانو د ساتنې غوښتنه هم وکړه.
په ورته وخت کې د فراه د ښاروالۍ رياست د تخنيکي او مسلکي آمر انجينر شاه محمود جلالي د ياد سړک
او
نورو رغنیزو پروژو د لوړ او بشپړ کيفيت د ډاډ ترڅنګ د ولايت مقام او نورو همکارو ادارو د ټيمونو له لوري له پلې شویو پروژو څخه د دوامدارې څارنې خبر هم ورکړ او ويې ويل چې د ټولو پروژو اړوند توکي لابراتوار شوي دي.
له بلې خوا د فراه ولایت د اطلاعاتو او کلتور رئيس محمد عبدالحي «سباوون» ویلي چې په ټولو ښارونو کې د اسلامي امارت په راتلو سره د رغنيزې پروژې چارې په چټکۍ سره پيل شوې دي، دا ځکه چې د پخوا په پرتله اوس په ټولو مالي او اداري چارو کې بشپړه روڼتيا رامنځته شوې او اداري فساد له منځه تللی دی.

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *