افغانستان

ملا آغاجان : د موسساتو فعالیتونه دې په اغېزمنه توګه ترسره شي

د کرنې، اوبولګولو او مالدارۍ وزارت مالي او اداري مرستیال ملا اغاجان اخند «حاجي سالم» د دغه وزارت د څارنې او ارزونې ریاست له رییس او کارکوونکو سره د کتنې په ترڅ کې د دغه وزارت او هغه مؤسسې، چې دکرنې او مالدارۍ په برخه کې کار کوي د ترسره شویو فعالیتونو پر څارنه ټینګار وکړ.
دکرنې وزارت مالي او اداري مرستیال دکرنې وزارت له رییسانو او چاروکو سره د لیده کاته په لړ کې د څارنې او ارزونې ادارې له رییس او چارواکو سره وکتل او هغوی ته یې سپارښتنه وکړه د هغه هوکړه لیک له مخې، چې دکرنې وزارت او همکارو مؤسسو ترمنځ لاسلیک کېږي، باید د دوی فعالیتونه په دقت او غور سره وڅاري او تر څارنې وروسته یې پایلې د کرنې وزارت او د مؤسسو له رهبرۍ سره شریک کړي، تر څو د فعالیت د اغېزمنتوب په صورت کې د هغې پر تطبیق ټینګار وشي او که یې فعالیتونه اغېزمنتوب نه درلودل او نیمګړتیاوې ولري اصلاح شي.
په همدې حال کې ملا اغاجان اخند «حاجي سالم» د کرنې وزارت د څارنې او ارزونې ریاست له کارکوونکو څخه وغوښتل، چې له خپلو دندو سره سم په مرکز او ولایتونو کې د کرنې وزارت د پروژو د کار بهیر له نږدې وڅاري او د څارنې پایلې یې دکرنې وزارت له رهبرۍ سره شریکې کړي.
د کرنې، اوبولګولو او مالدارۍ وزارت د څارنې او ارزونې ریاست په هېواد کې د کرنې، اوبولګولو او مالدارۍ سکتورونو د فعالیتونو د څارنې دنده په غاړه لري.

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *