د کډوالو په چارو کې د ملګرو ملتو عالي کمېشنرۍ د هرات زلزله ځپلو لپاره د ۱۴.۴ میلیونه ډالرو مرستې غوښتنه کړې ده. دې ادارې پرون پر خپله ټویټر پاڼه ویلي، چې دا بېړنۍ مرسته یې د دې لپاره غوښتې، څو ژر تر ژره د زلزله ځپلو لاسنیوی وشي. د ملګرو ملتو د بشري مرستو د همغږۍ د ادارې په وینا، په هرات کې د زلزلې د قربانیانو شمېر څوارلس سوو او د ټپیانو شمېر یوزر اته سوه پنځوس تنو ته رسېدلی دی. د اوچا په وینا، د زلزلو له امله په هرات کې تر درې زره ډېرو کورونو ته زیان اوښتی چې له دې ډلې دوه نیم زره کورونه یو مخ له خاور سره خاورې شوې دي.
