ګل به شي چمن به شي نور امن دی
ښکلي دا وطن به شي نور امن دی
هر خوا ته د سپین بیرغ وزري دی
زړونو ته دیدن به شي نور امن دی
د اولس دردونو ته شفا به شي
سم د درمل ستن به شي نور امن دی
سپین سحر حاکم دی ماښام کډه کړي
ورک نور ماخُستن به شي نور امن دی
دا د یوویشتم قرن ملنګ طالب
د هیواد څښتن به شي نور امن دی
خدایه حفاظت مو د نظام وکړې
روح د هر یو تن به شي نور امن دی
نور به دې (تپاند زُهاده) زړه جوړ شي
ګل به شي ګلشن به شي نور امن دی
تپاند زُهاد
