د پکتیا د کرنې، اوبو لګولو او مالدارۍ ریاست مسؤلین وايي چې د افغانستان لپاره د ناروې کمېټې له لوري د دې ولایت په مرکز ګردېز سربېره زرمت، احمد آباد او سیدکرم ولسوالیو کې د خوړو خوندیتوب بېړنۍ پروژه پرانیستل شوه. د یاد ولایت د کرنې، اوبو لګولو او مالدارۍ ریاست د طبیعي سرچینو آمر وايي، چې د دې پروژې اساسي موخه خلکو ته د کاري زمينې برابرولو سربېره د باراني اوبو او د ځمکې لاندې د اوبو سطحې ټيټوالې کنترول دی تر څو اوبه په ښه ډول مدیریت او د بې ځایه ضایع کېدو څخه يې مخنیوی وشي. نوموړي زیاته کړه، چې دغې پروژې پلې کېدو سره به څه د پاسه ۹ زره کسانو ته د کار زمینه هم برابره شي. د نوموړي په وینا د خوړو خوندیتوب بېړنۍ پروژې په چوکاټ کې به ۵۹ کوچنۍ بېلابېلې ساختماني پروژې هم پلې شي.
