افغانستان

د بلغاریا غمیزه؛ د اجسادو په رالېږد کې لوی خنډ نړیوال بندېزونه وو

په بهرنیو چارو وزارت کې پرون د هغو (۱۸) تنو هیوادوالو، چې د روان کال د فبروري په ۱۷مه نېټه یې د بلغاریا پلازمینه صوفیا کې اروپا ته پر لار په یوه کانټینر کې د تنفسي کمښت له امله ژوند له لاسه ورکړی و، د کورنیو د غړو لپاره د تعزیت، تسلیت او فاتحې د مراسمو د اداء په موخه د یاد وزارت د رهبرۍله لوري غونډه ترسره شوه.
په دغه تعزیتي غونډه کې د بهرنیو چارو وزیر د شهیدانو له کورنیو سره غمشریکي وکړه او دالله عزوجل څخه یې هغوی ته د صبر، زغم، حوصلې او نعم البدل دعاء وکړه، دغه راز یې ډاډ ورکړ چې حکومت به یې ملاتړی او همکار وي.
همدا راز مولوي امیرخان متقي د شهیدانو د کورنیو له غړو سره د اجسادو د رانقلولو د پروسې پر مهال موجودې هغه ستونزې شریکې کړې چې د نړیوالو ظالمانه بندیزونو له کبله رامنځته شوې وې او دغه بهیر یې له خنډ او ځنډ سره مخ کړی و.
د بهرنیو چارو وزیر وویل: موږ د جسدونو د نقل لپاره ځانګړې الوتکه چمتو کړه اجازه ورنه کړل شوه، دوه ځله هغه روپۍ چې د جسدونو د راوړلو مصارف کېدل مستردې شوې.
هغه وویل؛ دغه بشري موضوع کې د افغانانو پر وړاندي د نړیوالو غیر عادلانه تګلارې دا پروسه تر دریو میاشتو پورې وځنډوله.
د بهرنیو چارو وزیر په دغو مراسمو کې د وینا په یوه برخه کې په نړیوالو غږ وکړ چې بندیزونه لیري کړي تر څو افغانان وکولای شي چې په کور دننه او بهر خپلو اړتیاوو ته لاسرسۍ ولري.

Related Articles

ځواب دلته پرېږدئ

ستاسو برېښناليک به نه خپريږي. غوښتى ځایونه په نښه شوي *