د کلیو، بیارغونې او پراختیا وزارت له لوري د بلخ ولایت د چمتال ولسوالۍ په پشمه قلعه کلي کې د څه باندې ۳ میلیونه افغانیو په لګښت د یوه چکډیم د جوړولو چارې بشپړې او ګټې اخیستنې ته وسپارل شو.
دغه وزارت ویلي چې یاد چکډېم ۱۷متره اوږدوالی، ۴ متره لوړوالی لري، چې د څه باندې ۲۵۰۰ متر مکعب اوبو د زېرمه کولو وړتیا لري.
د یاد وزارت د معلوماتو له مخې؛ د دغه چکډېم د جوړولو په جریان کې لسګونه کسانو ته د کار زمینه هم برابره شوې وه. د دغه چکډېم په بشپړېدو سره د باران اوبه مهار او د ځمکې لاندې اوبو سطحه به برقراره وساتل شي.
هېره دې نه وي، چې په هېواد کې د سېلابونو د مخنیوي او ځمکې لاندې اوبو د پیاوړتیا په موخه د اسلامي امارت له لوري د هېواد په هره ولسوالۍ کې یو ـ یو چکډېم جوړېږي چې تر دې مهال یې د لسګونو چکډېمونو چارې بشپړې شوي او دا لړم لا هم روانه ده.
