ځايي مسوولینو په فراه او کندهار ولایتونو کې پر لسګونه جریبه ځمکه د کرل شویو کوکنارو د اړولو خبر ورکړی دی.
د فراه ولایت د بالابلوک ولسوالۍ مرستیال ملا عبدالهادي بیت الله باختر آژانس ته په استول شوې خبرپاڼه کې ویلي، چې د یادې ولسوالۍ امنیتي او کشفي ځواکونو د یو لړعملیاتو په ترڅ کې په بېلا بېلو سیمو کې شاوخوا پر ۱۲ جریبه ځمکه کرل شوي کوکنار له منځه وړي دي.
د یو بل خبر له مخې د کندهار ولایت د سپين بولدک ولسوالۍ په بېلابېلو سيمو کې پر ۲۰ جریبه ځمکه کرل شوي کوکنار واړول شول.
د یادې ولسوالۍ مسوولین وايي، چې د نشه يي توکو پر وړاندې د مبارزې کمپاین له پيل څخه په دغې ولسوالۍ کې پر ۲۴۵ جریبه ځمکه کرل شوي کوکنار له منځه وړل شوي دي.
