د روژې میاشتي برکتونه:
یو ویشتم برکت:
بل برکت د روژې د مبارکي میاشتي دا دی چي پدې مبارکه میاشت کي الله پاک خپلو ټولو بندګانو ته خاصه توجه کوي او هره شپه د الله پاک له لوري یو آواز کوونکی داسي آواز کوي: ای د خیر او ثواب غوښتونکې مخ را واړوه او د الله پاک نور عبادت وکړه تر څو ډېر ثواب تر لاسه کړې! او ای د ګناه غوښتونكې! د ګناه څخه لاس واخله، توبه وباسه او الله پاک ته راجع سه! لکه په حدیث کي چي راځي:
ويُنَادِي مُنَادٍ يا بَاغِيَ الخيرِ أَقبِلْ ويا بَاغِيَ الشَّرِّ أَقصِرْ.[سنن ابن ماجه1642]
ژباړه: یو آواز کوونکی آواز کوي چي ای د خیر غوښتونکې مخ را واړوه او ای د شر غوښتونكې د ګناه څخه لاس واخله.
دا خبره په دې خاطر کیږي چي په دې میاشتي کي د الله پاک د رحمت دروازې خلاصي دي نو مؤمن ته د ډېر عبادت د کولو او الله پاک ته د راجع کېدلو دعوت ورکوي او ګناهکاره انسان ته د ګناه د پرېښودلو او الله پاک ته د متوجه کېدلو دعوت ورکوي.
دوام لري…
څوارلسمه برخه / مولوي نورالحق مظهري
